Archive for the Keunst category

De bôle is har gouden brosj
mei diamanten út ‘e flochten koer,
sa brekt it libben yn de dei;
se rekket fan de krûk net los,
genietet fan har sulversnoer.

Dêr sit se yn it skimerljocht
en stoarret nei de oeren fan de ko,
sa krûpe oeren fan de dei;
wat kroep, hat gjin foldwaning brocht,
dochs bringt se molke nei Bordeaux.

De molkfaam fan Bordeaux fan Francisco Goya**

* Johannes Vermeer (1632-1675)
wie in skilder fan it ljocht.
De keukenfaam is tagelyk realistysk
en monumintaal.

* Francisco Goya (1746-1828),
in Spaanske skilder,
hat de molkfaam werjûn
yn kleare kleuren
en mei koarte streken.

Wat kin in herberch noch mear skinke
út ‘e kanne as har reade wyn
fan fol ûnthjit foar yn de jûn:
fertier dêr’t gasten heech op drinke,
want it deistich libben is mar skyn.

Hy leit dêr útteld mei de holle
op it hout, foar him is gjin ferwin,
syn sinten hat er har al jûn;
sy skonk mar ta, ’t waard him tefolle,
dat syn selskip wie foar har te min.

No skinkt se yn syn hege romer
kleare wyn mei kromkes erotyk,
in knypeach hat er har al jûn;
de hertslach rêd, de earmslach lomer,
mar fan beide is de toan gelyk.

De herberch spilet mei de winken
fan de hûnen en it pearke mei
yn ’t spul fan lûkend nei de jûn:
‘Lit ús der noch mar ien op drinke.’
Boppe wiist it bêdeguod de wei.

* Frans van Mieris (1635-1681)
stie bekend om syn fêste komposysje
en fine pinseelfiering.
De sêne yn de herberch is fol fan
ferburgen symbolyk.