april 27, 2026
fan Peter Paul Rubens*
Wat fiert in minske nei de bisten
dy’t har eigen paden gean,
natuerlik libje nei de genen
dy’t ûntstiene neffens Darwins
evolúsjeteory spontaan,
dêr’t jagers neat fan wisten.
It binne genen fan de minske
dy’t ferlykber binne mei
dy fan de liuw en tiger,
mins as rôfdier neffens Darwins
evolúsjeteory, net jaan,
mar nimme nei syn winsken.
It hynder tilt him yn de hichte
om op jacht te gean mei sicht
op liuw en tiger, beide rôfdier
neffens ’t minskelike tinken,
sels ek machtich om in oar te slaan,
syn slaaf striidt yn de lichte.
* Peter Paul Rubens (1577-1640)
Skilderij ‘Jacht op tiger en liuw’
april 10, 2026
fan Mario Carreno*
Mei swurden yn de fûst,
sa liket it teminsten,
geane sy de striid fûl oan,
mar ’t giet om swiete winsten.
Sy binne moarns al ier
yn ’t spier en oan de spieren
is te sjen dat sy fûl slaan,
dus binne sy de wiere
foar him dy’t mei de fûst
de baas is oer teminsten
tsien dy’t wurkje yn it reid,
it giet om swiete winsten.
Sy slaan de stâlen troch
en litte it sâlt rinne,
jouwe oan de wrâld wat swiet
is sûnder sels te winnen.
* Mario Carreno (1913-1999)
Skilderij ‘Sûkerreidsnijers’