juni 5, 2025
fan Fernando Botero*
De kat moast ek op it portret
as bist mei skerpe klauwen
en famylje fan de rôvers,
frettend fan in oar syn fleis,
de kat is net fergees sa fet.
De foks is dea en boppe him,
waard yn sêft bûnt feroare
foar de presidintsfrou om te
aaien, lykas ek de kat,
lykas de foks is dy ek slim.
De presidint is slim en fet,
oars net as om te wurden
presidint, ek om te bliuwen
hiel syn koarte libben lang,
hy wit de tastân sels noch net.
Syn beide soannen ha ek macht
as generaal en hoeder
oer soldaten en oer leken,
minder slim, mar like fet,
slacht elk op heit syn slimmens acht.
It famke rint der ek net út
wat fettens oanbelanget,
beppe koe dy trend net keare,
likemin as foks en kat,
sy krijt as iennige in tút.
* Fernando Botero (1932-…)
Skilderij ‘De presidinsjele famylje’
mei 22, 2025
fan Gelij Michajlovitsj Korzjev*
Hy leaude fêst yn ’t ideaal
dat rûnom wappere yn ’t read
fan deagewoane minsken
dy’t wrotten foar it deistich brea…
hy die grimmitich syn ferhaal:
‘Wy rûnen oer it grize plein
fan rûnom noch de âlde macht,
it wie ús demonstraasje
fan hjoed sil ’t wêze, no of nea,
dêr wie it lykwols net mei sein,
want ek it findel dat ik droech,
joech oan ús striid foar ’t ideaal
dat deagewoane minsken
rjocht hiene op mear as de lea
dy’t ûnder ’t âld rezjym swier woech.
Ynienen klonk de earste knal,
dy’t folge waard troch folle mear
foar deagewoane minsken,
dat oeral ware rûn de dea,
it resultaat wie fal nei fal,
ik pakte rap it findel op,
dat kleure as ’t fergetten bloed
fan deagewoane minsken,
in teken fan opstiene lea,
dy’t hearre lieten harren rop.’
* Gelij Michajlovitsj Korzjev (1925-2012)
Skilderij ‘de findeldrager’