augustus 29, 2024
fan Rembrandt
As reder wist er fan de wrâld
hoe’t it dêr faak rydt en fart
mei ’t kapitaal as koers:
goud streamde nei syn wente,
dat hy kriich syn blinkend part.
It Wurd blonk ek, liet him net kâld,
hy ferdjippe him dêryn,
hold sa in fêste koers
foar him en syn gemeente,
beide sylden foar de wyn.
Thús wie de Bibel ek it sâlt
dat gaadlik wie foar harren siel,
want sûnder koe it net;
hy liet syn Aaltsje priuwe,
dat sy kriich har eigen part.
* Rembrandt (1606-1669)
Skilderij ‘Portret fan Cornelis Anslo
en Aeltje Schouten’
augustus 22, 2024
fan Thomas Gainsborough*
De blêden rûzje op ’e wyn,
wylst Tom de hûn de frijheid hat
om earst te drinken, dan te draven
op ’e siik nei wat nijsgjirrich is:
in kikkert, mol of knyn.
Sy sitte, steane stiif yn klean
dy’t gaadlik binne foar ’t portret
en troch de moade foarskreaun wurde;
heit syn skilderstyl is neat mis mei,
sy moatte dêrfoar gean.
Mar leaver gean sy as de hûn
op ûndersyk nei wat har boeit:
de flinters dy’t yn frijheid fleane
op ’e siik nei kleuren, blom nei blom,
net oan de moade bûn.
* Thomas Gainsborough (1727-1788)
Skilderij ‘De húshâlding fan de keunstner’
Skilderij ‘De dochters fan de skilder
fange in flinter’
