In suchtsje hjir, in twirke dêr
en fierderop blakstil,
it woe net neffens skippers wil,
de sigaret as skûtsjestjer.

Mei fjirtjin yn it earste rak,
elk hie de romte wol,
mar by de kapboei waard it fol…
de kop derby, nei ’t bêste plak!

De Jouwer dreau de oaren op
en krong der tuskenyn,
de fok fernaam ynienen wyn…
de kapboei kaam rjocht foar de kop.

It stoarme oer it flakke wiet
fan kloatsek oant protest,
De Jouwer slagge foar de test
‘spring op ‘e boei, sjoch hoe’t dat stiet’.

Mar Eldert* hie dat net oan tiid,
want mei de parasol
hie hy de beide hannen fol…
ek oan ’t protest, dus út ‘e striid.

* Eldert Meeter

It wie in kleurich barren
en tagelyk ek bleat
by Starum op it strân
mei tank oan simmerbrân
en ’t wiet yn waarme steat,
mar koene se noch farre?

It gie foaral om heinen,
elk suchtsje moast deryn,
de skoaten rekken strak,
it doek kaam op syn plak,
mar friet de sinne wyn,
dan spuiden skippers bleinen.

Gjin better skip as ’t luchtbêd
sa tusken strân en float
om ’t driuwen oan te sjen;
fan alle skûtsjes fan,
is hy it dy’t hjoed scoret,
net Starum as de suchtstêd.