januari 13, 2025
fan ûnbekend*
Lit sosjaal de wierheid klinke
oer de brannen yn Los Angeles:
bestriden wurdt it fjoer mei man
en macht, mar net foar wa’t de macht
begeart om fjurrich kwea te tinken.
Lit him drinke ’t smoarge wetter
út syn eigen boarne: Social Truth…
en fange nutteleaze fisk,
lis oan syn skinen nei it fjoer
sadat er rekket op ’e kletter.
Lit it lân fan dream en winsken
nea wer stimme op in krimineel
as presidint, mei leagens, man
en macht stekt hy de wrâld yn fjoer
en flam, ferbrânt syn eigen minsken.
* Foto ‘Brân bestride’
januari 12, 2025
fan ûnbekend*
Lit ús stride foar it heitelân,
it lân fan net te tellen heiten,
net allinnich foar lân Noard,
mar ek foar ’t oard yn ’t easten,
Noard hâldt him oan de feiten.
Lit ús stride foar it earste feit:
de hiele archipel ûntdekke,
ek besitte as in oard
dat Noard syn speserijen
joech, bûgend rêch en nekke.
Lit ús stride foar it twadde feit:
de kleurling bylket net as blanke,
is net fan it knappe soart,
moat oer syn takomst swije,
foar syn ferline tankje.
Lit ús stride foar it tredde feit:
de archipel moat fan Noard bliuwe,
slút nea mei him in akkoart,
de kleurling sil swier lije,
lit him de dea mar priuwe.
Lit ús tajaan dat it hiel oars leit,
dat heiten deade ha de feiten
dy’t relativearren Noard
syn oanspraak op ’e minsken
dy’t foar de frijheid pleiten.
* Foto ‘Stride foar it heitelân’