februari 9, 2024
fan ûnbekend*
Maroon: oerlitten oan it lot,
mar ek de kleur fan de kastanje,
sa klinkt de namme fan de bergen
oan wjerskanten fan de mar
bedriigjend, donker ek de kleur,
de klimmer wurdt troch beide ferge.
De sinnestrielen nûgje út
om by de helling op te klimmen,
dan kin men wier wol ûnderfine
hoe’t ‘Maroon Bell’ klinke sil
al brekkend elke modderstien
om yn it wetter te ferdwinen.
Maroon: oerlitten oan it lot,
mar ek de kleur fan de kastanje,
sa klinkt de namme fan de bergen,
gearspannend, har komplot.
* Foto ‘Maroon Lake en Maroon Bells,
Colorado’
februari 2, 2024
fan ûnbekend*
fan ûnbekend**
Lit ús dangelje troch Llanes,
fiskersdoarpke oan de griene kust,
om te genietsjen fan gebouwen
dy’t strielje iuwen skiednis út,
lykas de muorre dêr omhinne,
foar histoarisy in lust.
Lûk dêrnei in reinjas oan om
nei de lege grotten ta te gean
dêr’t weagen tsjin de rotsen batse;
dy slite iuwenlang al út
en sille ’t fan de see nea winne,
al hoe rotsfêst sy ek stean.
Lit ús kuierskuon oanlûke
om te klimmen boppe doarp en grot
heech út, want útsicht hat de takomst,
giet boppe it ferline út
en mei it sicht op see en sinne
fielst dy as Poseidon god.
* Foto ‘Llanes’
** Foto ‘Bufones de Pria, Spanje’
