december 22, 2023
fan ûnbekend*
Lang sweefden fûgels boppe Bukit,
wiene hearskers sûnder grins
oer heuvels, strân en oseaan,
sy hiene dêr it ryk allinne,
want op Bukit wie gjin mins.
Miljoenen jierren letter strânen
minsken dêr, de sapiens,
de homo sûnder baan,
de fûgels wiene net allinne
baas mear, dat wie ek de mins.
Hjoed sweeft noch wol in fûgel boppe
Bukit, dy’t de minske sjocht
yn lúkse sûnder acht
te slaan op him dy’t is allinne
oerbleaun, fûgel sûnder rjocht.
* Foto ‘Bukit op Bali’
december 15, 2023
fan ûnbekend*
Daisetsuzan, besnijde bergen,
is de namme, mar der is noch mear:
de sulver- en de Jezospjirren
stekke mei har nuddels fier
út boppe oare beammen…
ûnder rint de pika, ek de brune bear.
De pika is in hazze dy’t ek
fluitsje kin, syn lûd rikt lykwols net
safier dat minsken nei dit lânskip
komme, ’t gea fan berch en bosk
en dier, om dêr te sjongen
by de pika-fluit, de bear fielt gjin ferlet.
By ’t rûzjen fan de beammen fluitet
wol de brêge mei, de pika docht
syn bêst om ek de bear safier te
krijen dat er sjongend bromt,
sadat de minske oer de
brêge komt, ek sjongend nei dit lânskip sjocht.
* Foto ‘Nasjonaal Park Daisetsuzan yn Japan’