Archive for the Skiednisbylden category

Lit it Frânske leger sjonge
foar Napoleon, syn jierdei fiert
er wylst er al foar Smolensk stiet,
in lûd jûchhei fan tûzen tongen.

Smolensk brânt troch de mortieren,
mar de muorren binne meters tsjok,
de Dnjepr sjongt fan lok en flok,
de Frânsman hat noch neat te fieren.

Lit it Frânske leger komme,
fine yn de stêd de hel allyk,
it fjoer ferskroeide mannich lyk,
it sjongen is al lang ferstomme.

Smolensk, stêd fan swarte muorren,
skeinde tuorren, keizerlik fersin,
foar ’t Frânske leger gjin gewin,
want rûnom smeule foarrieskuorren.

* Skilderij ‘Slach by Smolensk’

Sjoch him sitten op syn skimmel,
mei in rjochte rêch, de rjochterhân
al dagenlang op ’t hert,
de eagen rjochte op it fiere lân,
syn wil is wet.

Sjoch net achterom nei Frankryk,
dêr’t de honger waret troch it lân,
elk is nei Ruslân set,
de keizer nimt har by de hân,
syn wil is wet.

Sjoch mar nei tsaar Alexander,
dy’t mei Ingelân wol hannel die
en Frankryk trof yn ’t hert,
de keizer wit mei sa’n skarlún gau rie,
syn wil is wet.

Sjoch him sitten op syn skimmel
mei sânhûnderttûzen achter him,
hy is nei Moskou set,
fier klinkt oer ’t gea de keizerlike stim:
‘Myn wil is wet!’

* Skilderij ‘Napoleon op wei nei Ruslân’