Archive for the Skiednisbylden category

De holle rûn, it antlit skeind,
as bern bestoarme troch in bolle,
Danton waard in frijheidsfeint,
earst wie him neat tefolle.

Op grûn fan rjochten advokaat
en fierder nei de revolúsje,
sa ferfolge hy syn paad,
gjin sicht op de yllúzje.

Al gau in wichtich kwerulant
dy’t oprôp ta in demonstraasje
tsjin de Tuilerieën, want
lang libje folk en naasje!

Heech klimmend yn de hiërargy
waard hy minister fan justysje,
joech it leger ek noch rie,
hy koe fan alles hysje.

Hy fûn de wei nei minsklikheid:
lit ús gjin kristen mear ferfolgje,
want geweld, it is in feit,
sil ’t eigen folk ferswolgje.

As minske krige hy gelyk,
skeind waard er troch de guillotine,
’t antlit glimke nei it lyk,
der foel neat mear te finen.

* Skilderij ‘Portret fan Danton’

Marat, in man fan wittenskippen,
dokter, fysikus en filosoof,
en as politikus fol fjoer;
foar mannich tsjinstim wied er doof,
it bloed soe fan syn fingers drippe.

Marat, in man fan tûzen wurden,
sprekker, skriuwer, ek noch sjoernalist,
gjin strjitreboelje sloech er oer;
hy wist mei wissichheid: dit is ’t,
it oare koe om him ferwurde.

Marat, ferskûle yn rioelen
as in strjitpolitikus yn noed,
de revolúsje waard in toer;
it ôffal sloech him op ‘e hûd,
fan jokte hat er jierren woele.

Marat, as woeler moast er baaie
tagelyk yn wetter en yn bloed,
de moardnersdolk koe hy net oer;
hy hie gjin tiid mear foar in groet,
liet wol de earm noch efkes swaaie.

* Joseph Boze (sirka 1746-1826)
Skilderij ‘Portret fan Jean-Paul Marat’

** Jacques-Louis David (1748-1825)
Skilderij ‘De dea fan Marat’