juni 30, 2024
fan Francis Bacon*
De kriich rûn stadich nei de ein
en hie misfoarme hiel it libben
fan miljoenen, swij dan oer de dea
fan bern fermoarde yn de kampen,
har bestean is meunsterlik ferslein.
De meunsters laken by it krús,
dat wie teminsten de bedoeling,
mar se hawwe oan harsels genôch
om by te dragen oan de rampen,
sels de bernejiske kaam net thús.
It krús kaam foar har net yn byld,
want meunsters hawwe gjin begrutsjen,
sels net mei it lijen fan de bern
dy’t stikke yn de oarlochsdampen…
hawwe sy de lêste siken field?
De meunsters bliuwe yn byld stean
as teken fan in wrede oarloch,
dy’t misfoarmet wat net deade is,
gesichten dy’t fan smert ferkrampe,
wa kin dan noch foar ûntspanning gean?
* Francis Bacon (1909-1992)
Skilderij ‘Trije stúdzjes fan figueren
as basis foar de krusiging’
juni 23, 2024
fan ûnbekend*
Kompjûtermot, dit wie de namme
dy’t it earste rekkenwûnder kriich,
omdat in mot in steuring joech,
hy die dat ûnbeskamme.
Dat sa’n ynsekt sleat sa’n masine
koart, wie in primeur by sa’n primeur,
wat as in swiere bom ynsloech,
it gie net sûnder pine.
It apparaat wie ek bysûnder
mei syn langte, hichte en gewicht,
it hie in massa fan fiif ton,
it rekkene foar wûnder.
De mot berekkene de hoeken
foar it sjitten mei in skipskanon,
sadat de bom presiis ynsloech,
’t ynsekt koe men goed brûke.
* Foto ‘Rekkenmasine Harvard Mark I’