april 21, 2024
fan ûnbekend*
fan ûnbekend**
Wêrom steane minsken op
nei jierren ûnderoan te lizzen?
It swijen hat net langer sin,
sy ha noch wat te sizzen.
Poalen lieten harren út
oer Dútsers dy’t har ûnder leine
as minsken sûnder heger sin,
dy’t sy it stjoer ûntseine.
Stjoerleas lieten sy har net
troch Dútsers yn de djipte driuwe,
sy seagen yn de opstân sin
om sa harsels te bliuwen.
Warschau gie fol yn de striid
om fan de fijân ôf te kommen,
twa moannen hold de opstân stân,
mar ’t lot waard net ferromme.
Russen holpen Warschau net,
bleauwen fan de stêd op ôfstân,
wat easke ûnder ’t folk syn tol:
yn bloed ferrûn de opstân.
* Foto ‘Warschau, 1 augustus 1944’
** Foto ‘Monumint fan de opstân yn Warschau’
april 14, 2024
fan ûnbekend*
Hy hie in oare kleur as blank,
wie fan in minderweardich ras,
alteast dat fûnen militêren
fan it wiere heldedom,
sa’t sy harsels wurdearren.
En doe’t hy rap de klean oandie,
in pak dat kaam him breed fan pas
om mei syn ploech te demonstrearjen,
hold it heldedom him tsjin,
syn die moast wol mislearje.
Se skuorden him de klean fan ’t liif,
de helden sloegen derop los;
de fijân fan dy militêren
kaam net yn syn dwaan werom,
hy soe dy dei noch stjerre.
* Foto ‘Demonstraasje yn Los Angeles’
(juny 1943)