Archive for the Skiednisbylden category

It jonkje gie de ljedder op en del,
want Herman Willem promovearre,
wie ek jierren net yn tel,
as kening Daendels woed er stjerre.

As advokaat gie ’t wurd de mûle út,
hy skeat as kapitein mei kûgels
foar it Frânske folksbeslút,
seach foar de frijheid nei de fûgels.

Hy waard troch ’t frije wurd sels fûgelfrij
en flechte nei syn Frânske maten,
kaam mei har werom, it tij
feroare mei foar him de baten.

It wie de generaal net gau nei ’t sin,
de heechste steat lei foar it gripen,
mar it hie in min ferrin,
want Daendels kriich gjin Frânske stipe.

Fan romroft revolúsjonêr nei boer:
de rûge heidegrûn ûntginne,
foar syn bargen kaam der foer,
mar ’t fjurrich aard woe nei de sinne.

Yn ’t fiere Ynje waard er gûverneur
en letter yn it lân fan slaven,
dêr’t in ein kaam oan de fleur,
hy liet him yn dat gea begrave.

* Raden Saleh (1811-1880)
Skilderij ‘Gûverneur-generaal Daendels’

It waard fan see út in ynvaasje
op it strân en oer it dún,
doe fierder, want de earste slach wie wûn;
de fraach waard: rekket Amsterdam yn pún
of wurdt it lân oan ’t wetter jûn.

Gjin Brit of Rus kaam troch de polders:
wiete fuotten is in ramp,
foar beide, lea en strategy, net sûn;
it antwuurd waard: werom nei ’t eigen kamp,
ferlern hie ’t anty-Frânsk ferbûn.

* Dirk Langendijk (1748-1805)
Skilderij ‘Ynfal fan de Ingelsen en Russen yn 1799’