Lyrysk Deiboek – Pagina 662

oktober 9, 2016

Sulver foar goud

Deastil stiet er by de sleat
of mei de poaten yn it wetter,
flitsend stjit de snaffel ta,
feroaret hy yn fiskefretter.

Swalkjend fljocht er troch it gea
mei kromme hals en brede klappen;
fiverwetter liket sa
wol gaadlik om fluch ta te happen.

Keunstich hat it pear de tún
mei fisken yn it libben roppen;
roppich fljocht er derop ta
om troch de kiel it goud te tropjen.

Deastil hinget op ‘e kop
in swarte reager as ferskrikker,
mei de sulveren cd’s
ferjaget er de goudfiskpikker.

oktober 9, 2016

Lyrysk Deiboek

Hoe harke doe de faam it hea,
klear foar de feint syn loegjen,
weiden heech, de hynders swoegjend
foar de weinen, wiet de lea.

No ha se it yn streken sûnder
nammen, ûnpersoanlik ark
dat brommend klikt, it giet foar wûnder
mei it leanmasinepark.

De trekker lûkt de reade fretter
fan in hûndert meter hea,
fertart it dat er efkes letter
skyt de rôle oer it gea.

Mar wêrom soe men byldspraak rûke
dy’t net past by dizze tiid;
sjoch hoe’t de rôle-greidehoeke
’t keunstwurk fan de jûntiid biedt.