juli 15, 2024
Hy kaam fan ûnderen nei boppen,
moast de help ha fan in stok,
dy’t him hieltyd heger swypke
oant er rikte nei de ein,
fan lok hat hy doe roppen.
Benijd kaam hy fan boppen ûnder,
sûnder help fan wat dan ek,
joech him del om waar te nimmen
hoe’t de sprong ferrinne soe,
it waard foar him gjin wûnder.
Op eigen wjukken kin hy fleane,
sa berikt er ’t heechste lok,
sjocht de springer lytser wurden
omdat hy net heger kin
as fuotten dy’t heech geane.
juli 7, 2024
fan ûnbekend*
Daniël
Daniël gie wer nei Arioch,
dy’t him hastich nei de kening brocht
foar útlis oer de ûnbekende dream
om sa te sparjen alle wizen
dy’t de dream net brochten oan it ljocht.
Doe joech Daniël de foarst beskie
dat net hy, mar God it riedsel wist.
Hy makke ek de útlis iepenbier
om op wat komme soe te wizen:
‘Wit, o kening, dat gjinien dit mist:
Grut wie ’t byld dat jo foar eagen kaam:
goud de holle, sulver ’t liif, dêrnei
kaam koper, izer ûnder, mar sjedêr:
de fuotten wiene ek fan izer,
lykwols mongen mei de weake tichelklaai.
Sûnder hannen skuorde los in stien,
dy’t it hiele byld oan diggels sloech,
o kening, sa is ’t yn jo dream krekt gien.’
* Yllustraasje ‘It byld’