Archive for the Keunst category

Dêr stiet se dan, prinsesse Sofja,
finzen yn in kleastersel, har kou,
fanwege oarloch mei broer Peter:
heechferrie yn Ruslân fan in frou
dy’t flammet, want se wol har rjocht ha.

Foar lytse Peter regintesse
wie se heech yn oansjen yn it ryk,
sy woe it by it âlde hâlde
mei ’t elitekorps, mar ûngelyk
wie ’t striden fan de troanprinsesse.

No stiet se dêr mei strakke mûle,
earms dy’t klamme om it hymjend boarst:
it jonkje brocht de eksekúsje
fan ’t elitekorps… hoe doarst dy foarst
fan neat… nea soe se dêrom gûle.

* Ilja Repin (1844-1930) makke in tal skilderijen
oer ûnderwerpen út ‘e Russyske skiednis, ûnder oare
‘Prinsesse Sofja Alekseevna op ‘e dei fan de deastraf
fan de streltsy en de marteling fan har tsjinners yn 1698,
in jier nei har opsluting yn it Novodevitsji kleaster’.

Tusken rjochte streken, rûne bôgen
spilet him it hertnijs ôf
dat mei in gloede lôget,
twa kear brânt it, yn in frou.

Harkfink hat har hege stoel ferlitten,
smachtet net mear nei in toast,
woe fan de leafde witte
tusken Roaske en har Joast.

Boppe Harkfink hinget de goadinne
Juno fan it houliksbêd,
dus glûp der súntsjes hinne,
nea fan tuteboartsjen sêd.

Joast syn reade mantel, hoed en sabel
bylkje ûnder ierdryks kaart,
dus liket er kapabel,
foar in bleate tút paraat.

Hiel de kontekst bringt in toast as teken
op it hertnijs fan de frou,
perfoarst, it binne streken,
bôgjend op it brekken ôf.

* Nicoleas Maes (1634-1693)
waard berne yn Dordrecht,
wie learling fan Rembrandt
en wurdt wol skilder fan de
arsjitektuer neamd.