Archive for the Keunst category

Hy stiet op doek as libbensecht,
in man fan fleis en brûzjend bloed
dy’t harke nei in himelsk lûd,
syn libben naam in hege flecht.

As jonge wied er al in bear
mei spieren om derop te slaan,
syn hert moast lykwols lykwicht jaan,
oan Leave Hear kaam ta de ear.

Syn bloed koe net mei wetter ta,
de wodka joech it hillich fjoer,
syn smachtsjend fleis hie rêst noch doer,
foar ’t jûnsmiel woed er froulju ha.

Hoewol’t er wie fan fleis en bloed,
song er as bas mei lege stim
it himelhege liet foar Him
en makke sa syn sûnden goed.

* Ilja Repin (1844-1930)
makke it portret fan de aartsdiaken
earst as stúdzje foar in oar skilderij,
mar it waard in folweardich portret.

Wylst soldaten lizze yn de slom
en dreame fan in sletten grêf,
riist Kristus út ‘e tsjusternis
mei yn de hân de findelstêf,
de foet al ree fan tink derom:
Ik kom, fan ’t ivich libben wis.

Hoefolle tinzen ha befette
wat it is om op te stean?
Gefoelens hawwe ek net bean
wat yngiet tsjin de minskewetten.

Wylst syn neisten binne fan de wiis,
it fiele as wie ’t yn in dream,
komt hy wer libben út ‘e dea;
Siberië as Goelachseam
betelle hy syn lea as priis,
lykas it wie, sa wurdt it nea.

Ilja Repin**

* Piero della Francesca (sirka 1415-1492)
wie in Italiaanske skilder dy’t ek oer
de skilderkeunst skreau.
‘De opstanning fan Kristus’ is in doek
fan 225 x 200 sm.

** Ilja Repin (1844-1930), in Russyske skilder,
skildere ‘Unferwachts’, de thúskomst
fan de soan/man/heit út in strafkamp
yn Siberië op in doek fan 160 x 167 sm.