Archive for the Keunst category

Koe de snie noch langer lizzen bliuwe
as dat jier yn ’t Finske Noard?
’t Ferfeelde mei de wrâld yn ’t wyt,
mar einlings gie de tiid akkoart
mei tûken dy’t hjoed folop wiuwe.

’t Wie foar har, de dochter mei de namme
Beda, neamd nei beppe, faam
dy’t heal al op ‘e drompel stiet,
sy kriich fan heit it earste laam
as âldste fan de trije fammen.

Koe de snie noch langer lizzen bliuwe
as it om dit wite giet?

Krekt as is dit byld foar har ornearre,
beppe dy’t har dêryn sjocht
as famke op ‘e drompel dy’t
sy nommen hie nei ’t wite ljocht:
in himel ûnder tûzen stjerren.

Koe de snie noch langer lizzen bliuwe
as dat byld foar eagen stiet?

* Hugo Simberg (1873-1917)
wie in Finske skilder dy’t skilderijen makke
tusken Finske folkloare en symbolisme.

It barde yn de âlde tiden
dat it stiel fan trije swurden klonk:
in fûle oprop om te striden.

It wiene twa kear trije bruorren
yn takomstich fjochtsjen mei elkoar,
mar lûd klonk ’t gûlen tusken muorren.

De susters hiene in relaasje
mei de manlju fan de tsjinpartij…
wa hearde by de rjochte naasje?

De heit brocht lykwols trije swurden
foar de soannen, striidber rikkend fier,
sy swarden mei famyljewurden.

It wiene susters dy’t it seagen,
hearden fan it libben én de dea
en winsken dat it wie in leagen.

* Jacques-Louis David (1748-1825)
wie hôfskilder fan Napoleon.
Hy skildere û.o. histoaryske tafrielen.