oktober 11, 2024
fan Albert Bierstadt*
De Rockies makken djippe yndruk,
dy ympresje kaam sa op papier
dat skôgers witte lieten:
‘Dizze skilder lit ús sjen
in nije styl, net foar de sier,
mar lykas de natoer de yndruk jout.’
Mar doe’t de skilder fan de stúdzje
ôf it byld brocht op it grutte doek,
feroaren skôgers harren
miening: ‘Sjoch wat giet ferlern
as ’t skilderjen wurdt âld gebrûk
en de natoer gjin ynspiraasje jout.’
Wat bliuwt, dat binne wol de Rockies,
ymposante bergen, rikkend fier
út boppe sljochtweihinne
minsken, wa kin dan besjen
de hichte útgeand boppe sier
dy’t inkeld tydlik ynspiraasje jout?
* Albert Bierstadt (1830-1902)
Skets op papier ‘Canadian Rockies’
oktober 4, 2024
fan ûnbekend*
Goud en jade makket ryk,
dêr binne moarden om begien,
in krimineel sjocht op gjin libben,
wol nei eal metaal en hurde stien.
Sjoch de beam oan goud gelyk,
dy’t yn de wetterspegel sjocht,
in spegel mei de kleur fan jade,
fan dy rykdom krijt men nea jins nocht.
Mar lit Ruataniwha,
dat oanlein is troch minskehân,
mar sjen it duo-spul dat bringt de
eleminten yn in grut ferbân.
Litte goud en jade ha
de funksje fan in ryk symboal,
de kleuren yn ’t natuerlik libben,
dat de minske sjocht as syn idoal.
* Foto ‘Ruataniwhamar yn Nij-Seelân’
