Archive for the Wrâldbylden category

Shiretoko

fan ûnbekend*

Shiretoko is de namme,
park op in skiereilân,
iensum lânskip oan de ein,
gjin minske sil dêr wenje,
mar in brêge is hjir slein.

Slingerbrêge foar toeristen
om rûnom te skôgjen
fan ’t begjin en fierder nei
de ein, want Shiretoko
is sawat de ein fan wei.

Klim net oer de stielen leuning,
mar bliuw op it houten
paad, want Shiretoko is
de wrâld foar brune bearen,
op ’e brêge is men wis.

Foto ‘Shiretoko op Hokkaido yn Japan’

Wûnderlike evolúsje

fan ûnbekend*

Laguna del Caminante
mei syn mar en mannich berch
gie troch de iuwen hinne
sûnder revolúsje,
mar de gletsjers slieten út
de hurde rots… in evolúsje.

Laguna del Caminante
mei syn mar en kuierpaad
seach ’t skip fan Darwin farren
dy’t de evolúsje
trochtocht op ’e ierde brocht…
ûntwikkeling wie syn konklúzje.

Laguna del Caminante,
lit ús rinne oer it paad
dat wittenskip en wûnder
foar it minskdom sljochtsje,
witten slút gjin wûnder út,
dy beide sille ’t paad ferljochtsje.

* Foto ‘Laguna del Caminante’