Archive for the Skiednisbylden category

De fredesingel fljocht fluch oan,
as foar de harmony it toanbyld,
en blaast de twirren út ‘e hoarn
foar ’t wapperjen fan findels,
sjong dan mei op hege toan,
wat strykt mei it symboalbyld.

Gjin oarloch mear mei Ingelân,
fûn Frankryk, foar ús lân it foarbyld,
dus gjin soldaat byt mear yn ’t sân;
lit wapperje de findels
op ‘e dunen en it strân,
de see as it symboalbyld.

Wol hûndert skippen foeren út
de havens, frije feart as ’t oerbyld
fan hannel neffens ’t einbeslút;
nei ’t sjitten fan kanonnen
waard de keapwaar oarlochsbút,
de float as it symboalbyld.

* Symboalbyld ‘Frede fan Amiens’

Sjedêr, de skimmel mei Napoleon,
de sniekleur fan de Alpen,
’t skouderkleed sa read as bloed;
it giet moarn oan, earst striid dan rom,
de bergen heine al de gjalpen.

Hy wiist it paad, brigadegeneraal
Napoleon, nei ’t easten:
‘Bring Italië yn noed,
want striid en rom is myn ferhaal,
ik gean as Frânsman foar it measte.’

Sjedêr, de ezel mei Napoleon,
kontrastkleur mei de Alpen,
hjoed is hjoed, sa kâld as roet,
’t giet stap foar stap, de mûle stom,
soms klinke helpleas noch de gjalpen.

* Jacques-Louis David (1748-1825)
Skilderij ‘Napoleon stekt de Alpen oer’

** Paul Delaroche (1797-1856)
Skilderij ‘Napoleon stekt de Alpen oer’