september 30, 2018
fan ûnbekend*
Wa’t wêze wol lykas Napoleon,
giet yn ferbylding boppe oaren út
en lit syn krêften jilde,
mar hoe rint it yn de maraton?
Dorando Pietri gie fol moed fan start
yn Londen – twa jier earder foel er út -,
mar sjoch hoe’t hy him tilde
boppe oaren út, noch mear as dat.
Olympysk held, it rûn der grif op út,
teminsten as men nei syn rinnen seach,
op healwei noch sa linich,
mar hoe like dat by einbeslút?
Dorando Pietri kaam der slepend oan,
’t jûchhei fan it publyk rûn weach nei weach
as wie it nochal winich,
mar Dorando foel skril út ’e toan.
De rinner koe net op ’e fuotten stean,
waard troch officials nei de finish brocht,
wat hie wol wat fan tillen…
sûnder eare koe Dorando gean.
* Foto ‘Finish fan Dorando Pietri’
september 23, 2018
fan ûnbekend*
fan ûnbekend**
Hy liet him jilde as profeet
mei boeken dy’t de iuw beskreaune
fan alderheislikst fûle striid,
sa kaam de wrâld de takomst oan de weet,
gjin wapens dy’t ferburgen bleaune.
It witten siet al yn it brein
as jonkje, want hy woe ferkenne
fan eigen nei de nije tiid,
sa waard de basis foar de takomst lein,
de wrâld moast oan syn wapens wenne.
De oarloch fan de wrâlden waard
ferklearre troch de Martianen,
tentakel-wêzentsjes fan Mars,
se strielen ’t Britske leger fan de kaart
oant ierdske wêzentsjes*** opkamen.
Doe kaam de oarloch yn de loft
mei fleanmasines om te sjitten
op wat op ’t grûnflak stikken moast;
atoomfoarsizzings duorren noch in skoft,
mar Wells syn brein hat dêrfan witten.
* Foto ‘Herbert George Wells’
** Boekomslach ‘Oarloch yn de loft’
*** Baktearjes en mikroben