september 16, 2018
fan ûnbekend*
fan ûnbekend**
In beuker wol de wrâld ferkenne:
kening, keizer, admiraal,
it jout neat wat er wêze wol,
it is no ienkear syn ferhaal,
hy moat himsels dêryn werkenne.
Puyi, hy wie doe noch mar trije,
kaam yn Sina op ’e troan
en waard net wat er wêze woe,
mei seis jier seach er it him oan,
de revolúsje liet him swije.
Wer keizer waard Puyi mei alve,
sa woe ha in generaal,
mar tolve dagen letter hie
syn fijân in hiel oar ferhaal:
in jonge tusken ridels wolven.
Japanners, dy’t syn lân besetten,
setten Puyi op ’e troan,
lykwols allinnich foar de show,
dêrnei wie it foargoed bedoarn,
de foarst waard troch de Rus opsletten.
Puyi koe hiel de wrâld ferkenne:
beuker, keizer, boargerman,
it joech neat wat er wêze woe,
de oar betocht foar him it plan,
dêr moast it mantsje mar oan wenne.
* Foto ‘Puyi as beuker’
** Foto ‘Puyi as boarger’
september 9, 2018
fan ûnbekend*
Foarst Ferdinand waard klear gewaar
’t ferfal fan ’t Ottomaanske ryk
en rôp foar Bulgarije frijheid út,
himsels ta dekorearre tsaar…
de Rus beskôge him as bút.
Hy wie net Russysk-Ortodoks,
gie earder troch foar katolyk,
dus waard soan Boris yn dat leauwe doopt;
syn heit wie slûchslim as in foks…
de Rus hie dêrom noch wol hoop.
De doop fan Boris hie gjin doel
en moast yn heit syn fisy oer,
want Russysk-Ortodoks joech mear gewin,
ferhâldings wiene net mear koel…
de Rus joech Ferdinand syn sin.
In oarloch yn de hiele wrâld
rûn foar de tsaar net sinfol ôf,
hy waard ferslein lykas it Dútske ryk,
ferhâldings wiene winterkâld…
it lân waard doe in republyk.
* Foto ‘Ferdinand I’