december 9, 2018
fan Frank Rinehart*
Kin in yndiaan syn bertegrûn
ferjitte… nea sil hy wer laitsje,
om’t mem Ierde dan ek gûlt;
hy is yn frijheid dêroan bûn,
hâldt har yn eare mei de stam
en sil oer al syn berntsjes weitsje.
Koe Geronimo de macht wjerstean
fan blanken dy’t syn stam ferjagen
nei San Carlos’ reservaat?
Hy fleach dêrút as frije earn,
mar waard wer finzen, wjukleas lam,
’t wie dreech om noch de lêst te dragen.
Soe in yndiaan yn libbensjûn
net stilstean by de drege jierren
doe’t mem Ierde gûlend rôp:
‘Kom gau werom, de bertegrûn
is fan Geronimo syn stam!’
Op ’t stjerbêd klonk it noch fan fierren.
* Frank Rinehart (1861-1928)
Foto ‘Geronimo’
december 2, 2018
fan ûnbekend*
Der wurdt wol sein: ‘It is net wier
dat Peary op ’e Poal west hat.’
Dochs wie ûntdekken wol syn fak,
it kâlde noarden wie him net te fier.
Wat wier is, wie syn iere plan
om nei it hege noarden ta;
mei ’t Griene Lân as tuskenplak,
gie hy fûl fierder as koelbloedich man.
Hy foer earst mei de ‘Roosevelt’
safier as ’t iis him hawwe woe,
hy fielde him dêr presidint,
de eskimo’s beskôgen him as held.
Mei fjouwer glied er oer it iis,
mar Cook wie ek al ûnderweis
as syn fûleindich konkurrint…
de Noardpoal seach it oan en joech gjin priis.
Der wurdt wol sein: ‘It is net wier
dat Cook en Peary dêr west ha.’
Gjin tsjûge wie doe op dat plak…
de Noardpoal wie foar har miskien te fier.
* Foto ‘Robert Edwin Peary’