augustus 5, 2019
fan ûnbekend*
fan ûnbekend**
Sy wie fan goed komôf
en ryk troch har ideeën
foar berntsjes yn de nederklits,
’t idee fan mosk ta grutske pau.
Dokter wie foar har ’t berop
om minsken hiel te meitsjen,
ek foar de geast waard sy in gids,
’t idee fan ûnder nei de top.
Minsken wiene mear as brein,
it gie om alle sinnen
fan ’t bern, mei spul as stimulâns,
’t idee fan boartsje nei de ein.
Montessori en de wrâld,
sy reizge oeral hinne
mei as bestimming ’t swakke bern,
’t idee fan rypje mannichfâld.
Unrjocht koe sy mar min oer,
alhiel net oer tirannen,
sy liet har stânpunt dúdlik sjen,
’t idee fan sjenners oan it roer.
Montessori mear as frou,
in rykdom oan ideeën
joech útsjoch en de bern de kâns
om fan in mosk te wurden pau.
* Foto ‘Maria Montessori’
** Foto ‘Maria Montessori tusken bern’
juli 28, 2019
fan ûnbekend*
fan ûnbekend**
Charles Dawson groef graach yn de grûn,
te djip foar mar in amateur,
sa tocht de wiere wittenskip,
oant hy in holleplasse fûn.
De holleplasse fierde nei
de âldste tiden fan de mins,
doe tocht de wittenskip: ferhip,
de plasse bringt ús op ’e wei…
… fan evolúsje: aap nei mins
en dat yn ’t âlde Ingelân,
foar Afrika is soks in dip,
by ús begjint de earste tins.
En fierder gie it ûndersyk,
de plasse hie wat mei gemy,
dy joech de wittenskip in tip:
tink nei, want nijer is it lyk.
Charles Dawson wie doe al lang dea,
hy wie ek mar in amateur,
sa tocht de wiere wittenskip,
yn Afrika lei ’t âldste gea.
* Foto ‘Holleplasse fan de Piltdown-man’
** Rekonstruksje fan de holle fan de Piltdown-man’