augustus 18, 2019
fan ûnbekend*
fan ûnbekend**
Wat wit in meteorolooch
fan wat de ierde djip beweecht?
Hy hat op wolk en sinne ’t each
en is gjin geolooch.
Mar Wegener seach folle mear
as wat in geolooch beweecht:
hy skôge út ’e hichte wei
dat lân fan see ferlear.
It lân siet earst as ienheid fêst,
dreau troch de iuwen útinoar,
beweging út ’e djipte wei
kaam nei ’t ferrin ta rêst.
De geolooch seach net sa djip,
dreau mei de meteorolooch
de spot: ‘Hy hat oars net it each
as op it wolkeskip.’
Op Grienlân seach it each neat mear:
’t bedarre ûnder snie en iis,
it lichem waard earst letter fûn,
net skeind troch miuw of bear.
* Yllustraasje ‘Kontininten neffens Wegener’
* Foto ‘Wegener op Grienlân’
augustus 11, 2019
fan ûnbekend*
Sûn nei lichem en nei geast,
sa sille sporters stride
op ’e Spullen fan Olympus**;
lit gjin jild de foarstap krije:
hjir jildt meidwaan, dat komt earst.
Jim Thorpe die as yndiaan,
lykas syn foarfaars strieden,
alle war om earst te wurden
op ’e fiifkamp, as in frije
fint soe hy de rest ferslaan.
Goud wie him lykwols net gund,
want jild soe ’t spul net liede:
Jim fertsjinne sechtich dollar
yn de moanne, ’t koe net lije,
syn stunt ferlear it fan de munt.
Libbenslang focht troch syn geast,
hy stoar foar’t oare tiden
’t spul feroare op Olympus.
* Foto ‘Jim Thorpe’
** Olympyske Spullen fan 1912 yn Sweden