april 13, 2020
fan ûnbekend*
fan ûnbekend**
As man fan ’t Wylde Westen
skeat er bizons om it fleis
te bringen nei de wurkers oan it spoar,
syn earmen hongen selden stil,
syn skonken wiene altyd ûnderweis,
sa wie ’t bestean fan Buffalo Bill.
As man fan trettjin baantsjes
wie er letter as soldaat
it foarbyld foar it libben fan in oar:
yn ’t inerlik in sterke wil
en uterlik de wizer fan it paad,
sa wie ’t bestean fan Buffalo Bill.
As man fan show en sirkus
reizge hy fan plak nei plak
mei ‘Buffalo Wild West Show’ yn it spoar,
hysels wie fan ’t gehiel de spil,
de yndiaan kriich by him ûnderdak,
sa wie ’t bestean fan Buffalo Bill.
* Foto ‘Buffalo Bill’
** Foto ‘Buffalo Bill Wild West Show’
april 6, 2020
fan ûnbekend*
fan ûnbekend**
Lit Ieper ’t Melbourne mar fertelle
wat úteinlik oerbleau fan de stêd:
skeletten tsjin de grauwe loft,
dêr’t wêzens net mear libje koene
en de dea syn bút weihelle.
De fjouwer fûle konfrontaasjes
sloegen fuort de lea, ferskroeiden ’t blêd
en krongen troch yn long en bloed,
dêr’t wêzens net troch libje koene,
mar lang libje wol de naasjes!
Sykhelje, John Soldaat, ferromme,
yn de fuorge fynst in planken bêd,
dyn antlit is noch swart fan ’t roet,
sa’t wêzens it net hawwe woene,
mar goddank bist net omkommen.
Lit Ieper ’t Melbourne mar fertelle,
want dêr komsto wei, dyn bertestêd,
mei boppe see in blauwe loft,
dêr’t minsken altyd al ha woene:
John is troch de dea net helle.
* Foto ‘Ieper yn de Earste Wrâldoarloch’
** Foto ‘Australyske soldaten
by in medyske post by Ieper’
