november 10, 2019
fan ûnbekend*
fan ûnbekend**
Fan de hichte nei de djipte ta,
fan meteorolooch nei seismolooch,
fan kjeld hiel heech nei hjitte
yn de kearn, hy hold fan twa…
… wittenskippen, skôge earst it waar,
mei eigen eagen nei it hege swurk,
en letter woed er witte
oft de kearn brocht yn gefaar…
… ’t minskdom troch it skodzjen fan de grûn
of ’t gloeiend spul dat út ’e djipte spat;
hy hat der bot fan switten,
mar op ’t lêst de ierdkearn fûn.
Mei Charles Richter socht er nei in skaal
dy’t oanjoech wat de krêft fan ’t skodzjen is,
nei Richter soe dy hjitte…
djipper gie it kearnferhaal.
* Foto ‘Beno Gutenberg’
** Yllustraasje ‘Ierdlagen’
november 3, 2019
fan ûnbekend*
fan ûnbekend**
Hy woe him graach bewize,
om’t er lyts wie, ek te swak waard sein
troch Tankosic, Servysk majoar:
‘Nei hûs do, want oars krijst in klap!’
Gravilo soe de oanfal kieze.
Nei hûs ta wie gjin sprake
fan, yn plak dêrfan de ‘Swarte Hân’,
sadat de fijân kriich de klap,
foar ’t heitelân stie hy op wacht,
gjin tinken oan om dan te staken.
Franz Ferdinand liet witte
dat er kaam nei ’t anneksearre lân,
dat dêroan wenne moast, syn stap
koe liede nei noch grutter macht,
dat Bosnië soe ’t sa mar litte.
Wat wie der noch te kiezen
oars as grutter wurde troch it fjoer
dat trof de fijân yn de hals;
Europa kriich dêrnei de klap,
soe mei Gravilo ’t pleit ferlieze.
Syn eigen folk liet witte
dat Gravilo moedich wie, in held,
net lyts of swak yn ’t frjemde stoar,
mar grut en sterk wie as syn byld,
gjin sterveling soe him ferjitte.
* Foto ‘Gravilo Princip’
** Foto ‘Byld fan Gravilo Princip’