augustus 6, 2025
Hy hie in sterke wil,
dus naam er altyd foarrang
yn it wetter, syn domein,
dêr’t fisken mei ûntsach
him alle romte joegen
of tsjinnen as syn miel,
no leit er stil.
Gjinien wie sa as hy,
sa grut en fluch as wetter,
dêrmei wie net alles sein:
hy hearske as tiran
dy’t alle romte easke,
gjin diel mar it gehiel,
hy wie sa frij…
… om mei syn sterke wil
op wei te gean nei foarrang
op ’e dyk, net syn domein,
mar ûnder it gesach
fan meunsters as tirannen
dy’t easkje harren diel…
hy leit deastil.
juli 24, 2025
Wannear’t god Donar foar it ljocht komt
mei syn hammer Mjöllnir yn de oanslach,
wit dan dat gjin minske feilich is,
mei ’t fjurrich wapen slacht er wis.
Hy slacht de bliksem út ’e wolken,
fjoer dat folge wurdt troch tongerslaggen,
dy’t de minske op ’e knibbels twingt:
god Donar dy’t grimmitich klinkt.
As Israel Jahweh foar ’t ljocht ropt,
god dy’t inkeld foar dit folk bestimd is,
gjin Gazaan hat dan in feilich plak,
in tinte wurdt syn ûnderdak.
It folk fan god brekt troch de grinzen
fan de wearden fan it eigen leauwe,
fjurret mannich bliksem nei de grûn
en tongeret syn kwea yn ’t rûn.
Lit dêrom Donar mei syn hammer
komme no’t de wrâld Jahweh gewurde
lit, de bliksem fûl yn Sion slaan
om de Gazaan syn rjocht te jaan.