Archive for the Keunst category

Nea bestoarme hy de himel,
wie in skilder fan ’t bewende paad,
ferkearde leaver yn it skaad
as yn de kleurewrimel.

Dit is ’t byld fan Henriëtte,
omkesizzer, as model paraat,
mei wa’t er yn syn kleuren praat
om har stil del te setten.

Faam, sa sjochsto út dyn eagen,
kritysk, yn it libben al ier wiis,
ik set de himel yn blaugriis,
dyn hier rint út yn weagen.

Omke, moat ik lang sa sitte,
sels bist drok, do suchtest, switst dy dea,
sa gysten seach ik dy noch nea
of wolst it sels net witte?

‘k Wit it, faaks is dit myn lêste,
dêrom komt de himel yn blaugriis,
bestoarmers krije faak de priis,
do bist ien fan myn bêste.

* Henri Evenepoel (1872-1899)
krige syn oplieding yn Parys.
Hy oerwintere om syn swakke sûnens
oan de ein fan syn libben yn Noard-Afrika.
‘Henriëtte mei de grutte hoed’
is ien fan syn lêste skilderijen.

Hy hat krekt syn proai opfretten,
leit te wachtsjen op noch mear geweld,
de liuw as kening en tiran
yn Spanje, dêr’t gjin rjocht mear telt
en inkeld jilde oarlochswetten.

Trochsichtich stiet sy dêr te wachtsjen
mei allinnich fearren om de lea,
de Spaanske boppe yn de ban
fan boargerstriid ta eigen skea,
want sjoch hoe’t sy elkoarren slachtsje.

It kastke mei dy iene lade
hinget slop de reade lape út
fan ’t ûnbewuste yn de man,
dy’t foar de liuw ferwurdt ta bút,
sa falle oer it gea de skaden.

* Salvador Dali (1904-1989)
hat de Spaanske Boargeroarloch
op surrealistyske wize werjûn.
Hy flechte yn 1940 nei Amearika,
dêr’t er ferneamd waard.