Archive for the Keunst category

Kinne aaien oars wat sizze
as herhelling is it merk,
fan foarm ovaal, de kleur egaal,
de dop net al te sterk
en ek dat hinnen harren lizze?

Floris kin it neifertelle,
trije kear itselde byld,
fiif kear ovaal, de kleur egaal;
omdat it him besielt,
hat hy de keunst herhelle.

Libbenskeunst is de herhelling
fan wat is de minske nei,
ovaal of rûn, dat is egaal,
hy leit it eigen aai
en kleuret syn fertelling.

* Floris Verster (1861-1927)
skildere de nap mei aaien
trije kear, yn 1906, 1914 en 1915.

De spanning hinget yn de loft
krekt foar it alderlêste skot,
it bôgefolk hâldt al de siken yn,
de hûn stiet stil, ferwachtet wat,
mar ’t duorret foar ’t gefoel in skoft.

Noch mar in skoftke is it lyn
dat fjoer mei tonger ’t spul bedoar,
de lêste bôgesjitter wachtsje moast,
mar oerdreaun is de bui, in spoar
fan wolken wâlet op ‘e wyn.

De bôge hinget foar it boarst,
wylst brekt de sinne hoeden troch
en stekt it fjoer oan op it sjittersfjild;
de pylk en siken stûkje noch,
bekend wurdt nea de bôgefoarst.

* David Teniers de Jonge* (1610-1690)
wie master yn it skildersgilde fan Antwerpen.
Hy waard bekend troch syn sjenrestikken
en skilderijen fan bûtenaktiviteiten, dêr’t
‘De bôgesjitterswedstriid’ in foarbyld fan is.