Archive for the Keunst category

Hy wie in nuverling út Amsterdam
en libbe yn de Frânske tiid
as kluzener mei frjemde nammen,
samar lôge op de flam
fan heechmoed en fan striid.

De slach by Nieuwpoort wie syn ideaal
as skilder fan it grutte doek:
it libbensechte panorama
fan soldaat oant generaal,
yn heechmoed wied er tûk.

Fan oarlochsstrategy nei de muzyk,
fan generaal nei dirigint
of learaar fan twa leave dames,
oan de wikseling wol wend,
hie hy altyd gelyk.

* Louis Moritz (1773-1850)
wie yn syn tiid tagelyk frjemd en ferneamd.
Troch de útstalling fan syn panorama
‘Slach by Nieuwpoort’ fertsjinne er in lyts
kaptaal. Op it lytse skilderij ‘De muzykles’
hat er himsels yn de rol fan muzyklearaar
útbylde.

Ik, swalker oer it streamend wetter
fan rivieren slingerjend troch ’t lân,
ha foar de sinne en de moanne
spand de tinte yn de snoade stân
en kraait moarns ier de hoanne,
krij ik knap foar it ferstân:
rivieren streame better
as men set de dei nei eigen hân.

Se kamen daliks nei it kraaien,
fiskers, mannen tusken nacht en dei,
ik hearde ’t plûnzjen fan de riemen,
wist hjoed ha ‘k de simmersinne mei;
doe seach ik har koart kriemen
mei de netten samar wei
yn ’t wetter; fisken snaaie
like my wol snoad sa as it lei.

Ynienen hearde ‘k kij dy’t balten,
stadich glidend oer myn swalkrivier,
ik seach de fearman hingjend kloetsjen,
want it boerespultsje weage swier;
ik wist, myn taak is hoedzje
wylst snoad melkend dier nei dier,
sil bakke fisk yn molke,
sa kom ik de nacht troch… oant moarnier!

* Salomon van Ruysdael (sirka 1602-1670)
waard berne yn Amsterdam, mar it grutste part
fan syn libben wenne er yn Haarlem.
Hy skildere faak beammen, fertikale eleminten,
dy’t yn kombinaasje mei in horizontale struktuer
foar dramatyk soargen.
Skilderij ‘Rivierlânskip mei beammen’.