Archive for the Keunst category

As beammen klomsk de earms opstekke,
’t grau fan wolken slút de himel ôf,
it stek komt amper noch by it gebou,
dan bûcht de kraach stiif om de nekke.

De stoom kin it net waarmer krije
as de reizgers skowe oer ’t perron,
wylst harren stap en mûle bliuwe stom,
de earen ’t skrille fluitsjen mije.

En as se klomjend binnen binne,
is de hoop it spoar lûkt nei de sinne.

Sjedêr hoe’t ljochte wolken brekke,
beammen stekke tûken rynsk yn blêd,
it lije wetter rint mei lichte trêd,
it wachtsjen is om oer te stekken.

En fluitsjend rydt it spoar oer ’t wetter,
want de hoop kaam út, it waar waard better.

* Claude Monet (1840-1926)
wie ien fan de grutste ympresjonistyske skilders.
Skilderij ‘De trein yn de snie’
Skilderij ‘De spoarbrêge fan Argenteuil’

It wie har feest, de jierdei,
dat se rûn grutsk yn har moaiste jurk
mei yn de hannen it kado;
se balle al de hiele middei,
mar heit hie ’t drok, hy wie oan ’t wurk.

Mem hie wat pineholle
en it wie noch wol har moaiste dei
mei ’t winske slachspul as kado;
se telde, ’t wie har nea tefolle,
mar heit hie ’t drok, sy seach wêrmei.

Heit wist wol wat te meitsjen,
stimde by it ear doe snaar nei snaar,
it wie syn aldermoaist kado,
mar wêrom soed er dan net laitsje…
hy hie ’t te drok mei syn gitaar.

* Jean-Siméon Chardin (1699-1779)
waard yn syn tiid beskôge
as in sentimintalist fanwege
syn ienfâldige ûnderwerpen.

* Jean-Baptiste Greuze (1725-1805)
skildere ‘De gitarist’ op it hichtepunt
fan syn karriêre.