Archive for the Keunst category

It barde yn’t rampsillich jier
doe’t Frânske kûgels Spanje rekken
yn de nasjonale siel;
Napoleon syn kaarten rikten fier
om sa by ’t wrâldspul yn te brekken.

De Spaanske striders yn ’t ferset,
sy moasten harren moed belije,
waarden foar de lopen set.

De Frânske striders, net te let
in tel, sy ha de kaarten krigen
fan it spul, want wet is wet.

Sy spilen doe de kaarten út,
net troch de eksekúsje rekke,
want ûntspanning wie har diel;
sy namen dêr noch ien op ta beslút,
gjin loop koe ’t spannend kaartspul brekke.

* Francisco Goya (1746-1828)
is bekend wurden troch syn wurken
mei as ûnderwerp de wredens
fan de oarloch (1808).
Skilderij ‘De tredde maaie 1808’

** Ferdinand Leger (1881-1955)
makke as Frânske soldaat
de Earste Wrâldoarloch mei.
Skilderij ‘Kaartspyljende soldaten’

Syn drinken oan it jaar wie oer,
hy hie it memme-oer ferlitten
om te folgjen syn natoer,
dy’t útgie boppe minske-witten.

It lânskip naam syn wêzen op,
fan herten woe ’t him wolkom hjitte,
tankber bûgde ’t laam de kop,
de hoeder soe him net ferlitte.

De hoeder stie foar ’t wêzen noed,
syn keppel liet er by him komme,
skiep en laam, syn fleis en bloed,
sels by har dea yn katakomben.

De hoeder waard ek sels in laam
om yn syn wêzen troch te kringen,
kwetsber libben dat er naam
om yn it lânskip harmony te bringen.

* Franz Marc (1880-1916)
besleat yn 1900 om skilder te wurden.
Om’t er wurk ferneatige dat him net befoel
en yn 1916 as offisier yn it Dútske leger omkaam,
binne der fan him mar in beheind tal skilderijen.

* Dit fresko is te sjen yn in Romeinske katakombe,
dêr’t de kristenen har deaden begroeven.