Men hie net oars tocht as ’t is klear,
want Earnewâld wurdt kampioen,
net male dus om de finale,
oan de Zwaga’s* alle ear.

Mar wêr’t de spanning klimt, bart faak
dat perspektyf foar ’t oare winkt,
ferliezers dy’t nei eare tale,
lykas Joop**, ultym syn wraak.

Doarp Grou foer fûl al ier op kop,
wylst Earnewâld kaam let op gong,
it skûtsje swalke op plak trettjin,
dus gjin wimpel yn de top?

Mar ’t wie foar Joop noch lang net klear,
want Zwaga trije*** hie protest,
soe Huzum út ‘e útslach jeie,
dat syn broer wûn, Joop ferlear.

It spul gie nei de wedstriid troch,
want Earnewâld wie kampioen,
mar Grou koe yn de Feanen kraaie,
lykwols wie dy striid omdoch.

* Jeen Zwaga fan Earnewâld
Ulbe Zwaga, syn heit en adviseur
** Joop Mink fan Grou
*** Lammert Zwaga fan Langwar

Se sylden blank op eigen mar
en hiene fan gjin achterfolger lêst,
wylst Lemsters al it lofliet songen,
mar foar oaren like it net bêst.

De striid wie fûl, mar ek noch bar
doe’t Lammert* Joop** it mannewaar opsei,
wylst Lemsters al it lofliet songen,
hong it read yn ’t want, it like faai.

Grou wie sawat al kampioen,
mar soe de kop ferlieze mei protest,
dit wie it liet fan lilke tongen:
‘As Langwar it wol, hat Joop der west!’

De Lemmer hie de striid al wûn,
wa’t oars noch winne soe, wie noch net klear;
de Wyldeman hie hûndert tongen:
‘Nei de klok fan Arnemuiden mear!’

Doe sieten Joop en Lammert yn
de sjuerykeamer dêr’t it switte wol,
wylst lûden troch de muorre krongen:
‘Lit ús drinke oant de strôt is fol!’

Langwarder Lammert woe wol ha
mei praten is de saak wer út ‘e wei,
mar Joop is net dy wei op gongen,
syn prinsipes wiene dêr net nei.

Se sylden donker der op ta,
protest ferlern en dus gjin kampioen,
gjin flagge waard op Grou ophongen,
lykwols wiene Joops prinsipes sûn.

* Lammert Zwaga fan Langwar
** Joop Mink fan Grou