It wie wat dizich yn de seal
fanwege spanning oer it útstel
dat oer Ulbe Zwaga gie,
want waard it hiel of heal,
útsluting frege breed berie.

In mêst dy’t tsjin de mjitstêf wie
en tsjin ’t bestjoer in grutte mûle,
dat de skipper moast foar ’t rjocht,
guon leden wisten rie:
oan hiel of heal as straf waard tocht.

In hiele straf, sa fûn ’t bestjoer:
fiif jier net op it dek as skipper,
dat de helte wie te licht,
sa net, dan is it oer
foar it bestjoer, dus út it sicht.

It waard wat rûzich yn de seal,
de spanning kroep oer de gesichten:
waard it Ulbe of ’t bestjoer?
Gjin tafel rekke keal,
’t beslút wie foar de skipper soer.

Dêr leit it dan, mar op it droege,
want it Jouster skûtsje giet foar rjocht,
’t wol rehabilitaasje,
fan royearje hat it skjin syn nocht:
wa soe in flakke boaiem bûge?

Yngenieurs, lit dy mar mjitte,
want sy ha op ’t lêst der lang foar leard
en net foar de sensaasje,
wittenskiplik, oars giet it ferkeard
en komt De Jouwer neat te witten.

Mei allerhande ynstruminten
komt de boaiem fan it skip yn ’t ljocht
en ek yn de kompjûter,
op dy wize wurdt nei wierheid socht
en wrachtich wier net om de sinten.

De sifers kinne net fertelle
hoe’t de boaiem is: wol flak of bol…
hoera foar de kompjûter!
Mjitters eagen hâlde ’t langer fol:
gewoan de milimeters telle.