februari 10, 2025
fan ûnbekend*
It lân dat iuwen hearske oer
de weagen, ek de heale wrâld
syn wil oplei, hold net mear stân:
koloanjes waarden steaten,
oerbleau inkeld Ingelân.
Lit Yndia en Pakistan
har eigen frije gong mar gean,
sy libje neffens har natuer:
in stambeam mei syn leaten,
boppedat bloeit de kultuer.
Natuer, kultuer, ferjit dan net
de godstsjinst, boppe alles út
giet Allah en de goadewrâld,
dy’t minsken ’t heil yngeaten,
ûnheil makket folken kâld.
Lit Yndia en Pakistan
net stride om de steat Kashmir,
want frijheid hâldt net langer stân
mei beammen sûnder leaten…
godstsjinst stekt it lân yn brân.
* Kaart ‘Konflikt Kashmir’
februari 2, 2025
fan ûnbekend*
fan ûnbekend**
George Marshall, berne mei ien stjer
om’t er út ’e middenklasse kaam,
klom op nei’t militêre firmamint
en letter nei it politike,
syn karriêre wie lykas in sprint.
As generaal fan hjir nei dêr;
yn de Earste en de Twadde Kriich
koördinearre hy de strategy,
útrinnend op ’e alliearre
sege mei fiif stjerren foar syn rie.
Fiif stjerren wiene net genôch
om yn Sina te bemiddeljen:
de Kommunist fersloech de Kwomintang,
tegearre woe it net regearje…
dus Taiwan as steat, mar foar hoe lang?
George Marshall seach oan ’t firmamint
bleke stjerren nei de Twadde Kriich:
Europa’s steaten yn in minne steat,
hy koe sa’n útsicht net ferneare,
mei syn stjerren waard de delgong keard.
* Foto ‘George Marshall’
** Print ‘Marshall-help’
