Archive for the Skiednisbylden category

Wit in berntsje hoe’t it rinne sil,
de op- en delgong fan de tiid?
It hat gjin stjoer noch oer syn wil,
is mei syn boartershynder bliid.

Lytse Willem foel fan ’t hynder ôf,
in smak de kant út fan de dea,
de kromme rêch wie bûnt en blau,
wat wiisde op trochrinnend skea

Puber Willem moast wol oan de frou,
in faze fan wol tolve jier,
garânsje foar de houlikstrou,
foar trou oan ’t lân wie ’t noch te ier.

Oarlochsdriging rôp prins Willem op
as hâlder fan de heechste macht,
syn opgong rekke nei de top,
de delgong lei noch yn de nacht.

Rike pachters fan belestingjild
bestielen jierrenlang it folk,
mar Willem hold him bûten ’t fjild
fan rjocht, wie net de rjochte tolk.

’t Rûn foar Willem by de hichte del,
de rêch waard krommer, koe gjin macht
mear drage, rekke bûten stel,
de prins glied stadich yn de nacht.

* Skilderij ‘Portret fan steedhâlder Willem IV’

Bergen op Zoom,
fol mei soldaten,
dus lit de Frânsman no mar komme,
sa hearden boargers bûten praten.

Bergen op Zoom,
mei lege strjitten,
want minen kinne samar ploffe,
sa hie de Frânsman hearre litten.

Bergen op Zoom,
op ’t lêst ynnommen,
berôve fan de stedske skatten,
de stimmen wiene doe ferstomme.

Bergen op Zoom,
dyn wapenskylden
beseach de Frânsman út ‘e hichte,
wylst froulju har as finzen fielden.

* Steven van Esveldt (útjouwer)
Print ‘Belis fan Bergen op Zoom
yn de Eastenrykske Suksesje-oarloch’