Archive for the Skiednisbylden category

De ear wie foar it leger,
striidber ûnder generaal Kléber,
as arsjitekt mei eagen
net inkeld hjir, mar ek ris dêr,
om’t sfinksen ieuwenlang al seagen.

Wylst pylders ’t striidspul skôgen
fan de Mamelukken, fûl op winst
by ’t rêstplak fan de sinne,
wie ’t Frânske sjitspul net it minst,
dat generaal Kléber koe winne.

detail

De arsjitekt hat skôge
’t ieuwenâlde bouwurk mei de skea,
mar sleat dêrnei de eagen:
in moardner die him oan de dea,
de bouskea hat him net mear pleage.

* Léon Cogniet (1794-1880)
Skilderij ‘De fjildtocht yn Egypte,
de Slach by Heliopolis op 20 maart 1800’

Sjedêr it lân fan monuminten,
piramide, sfinks en wat al mear,
mar hiene se dêr each foar?
It gie op ’t lêst om kriichsmans ear,
ferbylde yn oerwinningslinten.

Se strieden yn it lân fan goaden,
Isis en Osiris en noch mear,
mar hiene se dêr each foar?
It gie op ’t lêst om harren Hear,
se tsjinnen as syn oarlochsboaden.

Sjedêr it rêstplak fan soldaten
fan Napoleon op ’t monumint,
se hiene dêr wol each foar,
ferfallen as it wie, in hint
dat falle soe wa’t sy fûl haten.

* Jean Charles Tardieu (1765-1830)
Skilderij ‘Pypskoft fan it Frânske leger
yn Syena (Assûan), 2 febrewaris 1799’