Archive for the Skiednisbylden category

Nei Sint Helena, ’t fiere ballingsoard,
in lange seereis fan tsien wiken
mei fjouwer diplomaten foar it praat,
mar doe’t it selskip kaam fan board,
wie ’t stil, de bou net ôf, die bliken.

In muorre om ’t gebou fan fjouwer myl,
in wacht fan hûnderten soldaten
en fiif oarlochsskippen foar de eilânskust,
’t wie oars as ’t Ingelske asyl,
gjin taak mear foar de diplomaten.

Gjin sprake fan in keizerlike taak,
’t wie alles foar ferdivedaasje:
hynsteriden, túnwurk en ’t bestean op skrift,
ferfeling wie in minne saak
mei ’t stoarjend tinken oer de naasje.

De keizerlike krêft kaam yn ferfal,
mar mei syn geast foel net te spotten:
hy besleat, syn hert soe ûndergean yn wyn,
syn sizzen tsjûge fan syn rol:
‘Ik hie yn Moskou stjerre moatten.’

* Benjamin Robert Haydon (1786-1846)
Skilderij ‘Napoleon op Sint Helena’ 

Trije jier en dan al oer
de Noardsee flechtsje foar asyl;
de Frânsman wie gjin Anglofyl,
woe dat syn float de see oer foer.

Jierren letter nei Berlyn
foar ’t Pruisyske soldatefak,
as militêr wie hy teplak,
’t gie erfprins Willem foar de wyn.

Spanje waard syn striidterrein:
yn ’t leger fan de Ingelsman
focht Willem tsjin Napoleon,
dêr wie it lêste net mei sein.

Waterloo  is noch net meld,
dêr’t Willem focht en kriich in skot
yn ’t skouder, ’t wie in gouden gat:
de naasje eare him as held.

* Jan Willem Pieneman (1779-1853)
Skilderij ‘De slach by Waterloo’