Archive for the Skiednisbylden category

Machu Picchu ûntdekt

fan ûnbekend*
fan ûnbekend**

Fan hûs nei Súd-Amearika
om Simon Bolivar te moetsjen,
firtueel, net as persoan;
sa gie ik op ’e hichte ta
en wist net wat ik boppe seach:
ik mocht de Inka’s stil begroetsje.

Har muorren wiene grien begroeid,
de wenten, timpels en paleizen
seagen my beskamsum oan:
wat brutsen wie, hie earder bloeid,
gjin Inka kriich ik yn it each,
de skiednis makke frjemde reizen.

My waard dêr stadichoan ferteld
dat tûzen minsken wenne hiene
yn dy stêd mei goud bekroand;
mar neat waard oer it bouwen meld,
de brek kaam op my oer as pleach…
hoefolle libbens deade wiene?

Wat oerbleaun wie, stie rjocht oerein,
fertelde altyd noch in bytsje
fan de Inka as ikoan,
in byld yn iuwen net ferflein;
ik, Hiram Bingham, dy’t dat seach
as earste reizger: Machu Picchu.

* Foto ‘Hiram Bingham’
** Foto ‘Machu Picchu’

In slagge ein

fan ûnbekend*
fan ûnbekend**

Wa’t jild hat, kin heech fleane;
mei foarfaars sinten út ’e feart
is ’t wetterfleantúch berne;
de ein fleach fuort en kaam wer del,
‘Le Canard’ moast efkes wenne.

’t Idee fan Henri Fabre
waard troch gjin eangst foar weagen keard;
nei fjouwer jierren bouwe
mei hûnderttûzen Frânske frank
wie de ein wol te fertrouwen.

De fûgel sloech de wjukken
út… hie de ein wol swimmen leard?
’t Publyk stie mei tsien fragen
nijsgjirrich op ’e kant te sjen
hoe’t er mei syn slaggen slagge.

* Foto ‘Le Canard foar de start’
** Foto ‘Le Canard op it wetter’