mei 19, 2024
fan ûnbekend*
De wrâld soe wêze in gehiel,
him spegeljend oan it hielal
mei stjerren en planeten:
elke lieder as in stjer,
it folk as mannichfâldich diel.
De wrâld yn oarloch, diel nei diel
waard konfrontearre mei geweld,
de stjerren en planeten
rekken jierren út har baan…
wat soarge wer foar in gehiel?
Wat net mear rjocht stie, moast oerein
mei jild dat wrâldwiid útstruid waard:
de Wrâldbank mei syn stjerren
waard de spegel foar de groei,
mar wie dêrmei de grûnslach lein
foar frede yn de wrâld as in gehiel?
* Foto ‘Wrâldbank’
mei 5, 2024
fan ûnbekend*
Lit de wrâld net hjitter wurde
troch it fjoer dat út ’e loop
fan stielen wapens komt,
sa is de tastân hjoed de dei…
hoe wie it juster?
Juster bleau it noch by wurden:
NAVO tsjin it Warschaupact,
de oarloch wie doe kâld
as iis, de frijheid wif en faai…
is ’t moarn dan better?
Moarn sil Frijheid wisser wurde
fan it antwurd op ’e fraach
hoe’t elk him wapenet
tsjin wurden dy ’t ferflokke ’t rjocht
op eigen miening.
* Foto ‘Nederlânske flagge’