juli 23, 2023
fan ûnbekend*
fan ûnbekend**
Hoe komt it as de fijân komt
en mei geweld it lân beset,
kin dan it folk him noch wol rêde?
It bliuwt yn eigen doarp of stêd
en suchtet ûnder fijâns wet.
Hoe komt it mei de keningin,
de heechste mem fan hiel it lân,
kin dy har bange bern noch rêde?
Sy flechtet oer de wide see,
ferbrekt dêrmei de hechte bân.
Hoe komt it mei de kening fan
har buorsteat súd fan Nederlân,
as heit kin hy it ek net rêde,
mar bliuwt wol by syn bange bern,
hoewol’t dêr hearsket moard en brân.
It komt grif hoe’t men dêrnei sjocht:
it risiko fan hjir of dêr,
it sicht op wat men hjir noch rêde
kin of op ôfstân stjoere kin…
en nei de oarloch bist in stjer.
* Foto ‘Keninginne Wilhelmina’
** Foto ‘Kening Leopold III’
juli 16, 2023
fan ûnbekend*
As maten út ’e sleurgong brekke
fan de dei dy’t neat te bieden hat,
dan folgje sy de oer-natoer
fan jagers op it grutte wyld
en sjoch wat sy ûntdekke…
… in gat dat maten djipper fiere
sil as nei wat sleur te bieden hat:
de bylden fan de oer-natoer,
de prehistoarje mei it wyld
dat libbe doe op ierde.
De maten ha ’t ferline rekke,
meitsje oan de wrâld de jacht bekend;
histoarysk is de bûnte bút
fan bisten op ’e hurde rots,
in spear stekt nei de nekke.
It folk, dat ek op wylde dieren
jeie wol, ferskynt massaal op ’t plak
dêr’t jagers bylden bisten út;
ûntsnappe as grut risiko
liedt ta in stop ynfiere.
* Yllustraasje ‘Dieren fan Lascaux’
