augustus 6, 2023
fan ûnbekend*
De Dútsers dy’t ús lân besetten,
namen weet en rogge yn beslach,
wat guon pasjinten better makke.
De dokters stiene foar in riedsel:
hiene de besetters sa’n gesach
dat dieven har genêze koene?
It riedsel wie om op te lossen:
weet en rogge sitte gluten yn,
dêr’t minsken siik fan wurde kinne.
Dus wa’t allergysk is foar gluten,
giet syn hiele libben op dieet,
sa kin er ’t fan syn sykte winne.
De Dútsers dy’t ús lân besetten,
lieten sa de wittenskip in slach
slaan, foar pasjinten koe ’t net better.
* Yllustraasje ‘Glutenallergy’
juli 30, 2023
fan ûnbekend*
As de wjerljocht nei de ierde flitst
en yn in toer of wente slacht,
dan lit natoer him jilde,
foar de minske oermacht.
Doe’t de loftmacht oer de Noardsee fleach,
de eachopslach op Londen kriich,
wist Dútslân: ’t soe grif slagje
mei de flugge Blitzkrieg.
Doe’t de stêd yn ljochte lôge stie,
wie ’t folk ferslein en wist gjin rie;
mei withoefolle deaden
kaam it oer as misdie.
As de wjerljocht nei de ierde flitst,
wit elkenien wêr’t dat op slacht,
mar slacht de Blitzkrieg ta, dan
komt oer ’t folk in oermacht.
* Foto ‘Bommewerpers fan de Blitzkrieg’