september 17, 2023
fan Henry Moore*
As bommen falle op ’e stêd,
wêr moat men dan oars hinne
as massaal de djipte yn?
Dêr lôget net in deadlik fjoer,
mar mist men wol de sinne.
Oan ’t bern jout mem de waarmte troch
wannear’t de djipte trillet
fan de bommen op ’e stêd;
de grutste bangens is dan oer
as mem syn triljen stillet.
Gjinien jout him hjir rêstich del,
massaal is men allinne
mei syn eigen inerlik;
dat jout yn dit ferbân gjin stjoer
oan skonken dy’t neat kinne.
Want rinne kin men boppe net
en amper yn de djipte,
dêr’t de massa hâldt him yn
oant it deadlik fjoer is oer
en boppe ûnder tipt hat.
* Henry Moore (1898-1986)
Tekening ‘Yn de skûlkelder 1’
Tekening ‘Yn de skûlkelder 2’
september 10, 2023
fan ûnbekend*
Is de wei oer lân ôfsletten,
soargje foar in brêge troch de loft
om iten nei Berlyn te fleanen,
ek al duorret soks in skoft.
Lit de Russen it net winne
mei blokkades yn de kâlde striid,
wat liket foar it folk op fleanen
nei in hongerige tiid.
West-Berlyn sil it oerlibje,
nettsjinsteande militêre macht
dêr’t Russen yn dy tiid foar geane,
oeral steane sy op wacht.
Russen geane op werhelling,
keare ek it Oekraynske nôt,
nearne dêr’t sy rjocht foar steane,
libbens litte harren kâld.
* Foto ‘Berlynske loftbrêge’