oktober 8, 2023
fan ûnbekend*
Hoe lang hat sy noch libbe
yn de mûning fan de Theems,
wyld meifierd troch de streaming,
koers hâldend nei de see…
sy hie nei heger stribbe.
Op wjukken nei de hichte
wie har earste wylde winsk,
in fiere flecht, in oare,
as frou ek in primeur…
sy fielde har ferplichte…
… ta earst emansipaasje:
fleane nei Australië
as frou alhiel allinne
en letter yn de striid
foar Ingelân, har naasje.
Op wjukken nei de hichte
foar de winst foar ’t heitelân,
seach Amy Johnson ûnder
har ’t weagjen fan de Theems…
sy crashte yn de lichte.
* Foto ‘Amy Johnson en har fleanmasine’
oktober 1, 2023
fan Corrado Cagli
fan ûnbekend*
As puber seach er mannich stjer
wannear’t er by syn keppel lei
om nachts de wacht te hâlden;
ien liet oan him in knypeach sjen:
oer dy hâld ik as stjer de wacht,
do bliuwst de iuwen troch behâlden.
As kening liet er hjir en dêr
sjen hoe’t men troch it libben gie:
mei rjochte rêch, ek fallend;
soms wie de stjer net mear te sjen
en lei er yn de neare nacht,
al hie hy ’t leafst de stjer ha wollen.
Syn neiteam kriich op ’t lêst de stjer
opnaaid as teken fan de wei
nei neare isolaasje;
sels âlde lju en lytse bern,
elk waard oansein de deade-wacht…
de stjer waard dôve troch dy naasje.
* Corrado Cagli (1910-1976)
Skulptuer ‘Davidstjer’
** Foto ‘Davidstjer’
