februari 2, 2020
fan ûnbekend*
fan ûnbekend**
Franz Jozef, noch mar achttjin jier,
waard foarst fan machtich Eastenryk,
it wie it jier fan revolúsjes,
mar de keizer woe gjin omkear ha,
hy joech wat bliuwend wie gelyk.
Elisabeth, ek Sisi neamd,
seach hy wol sitten as syn frou;
sy hie gjin inkele yllúzje
dat de keizer woe allinnich ha
in keizerinne… wie hy trou?
Franz Jozef wie trou yn syn wurk,
fan moarns betiid oant yn de nacht,
hie yn syn âlde styl fidúsje,
mar ferlear op ’t slachfjild slach nei slach,
dat Eastenryk joech ta yn macht.
It faaie libben sloech ek ta
mei moard en selsmoard en syn broer
moast ûndergean de ekskekúsje,
mar de keizer libbe troch, woe ha
foar Eastenryk in sterk bestjoer.
Franz Jozef, seisentachtich jier,
wie keizer fan ’t ferswakke ryk,
yn oarloch ek, wrâldwide rúzje,
makke net mear mei de lêste slach,
wat bliuwend wie, kriich ûngelyk.
Skilderij ‘Franz Jozef’
Foto ‘Franz Jozef’
januari 26, 2020
fan ûnbekend*
fan ûnbekend**
Lawrence, kolonel fan ’t Britske ryk,
jim strieden tsjin de Ottomanen
yn de earste kriich oer hiel de wrâld,
jim woene, harren macht soe tane.
Lawrence, jimme ha it doel berikt
mei stipe fan de Arabieren,
dy’t yn opstân kamen tsjin it ryk
dat iuwen hearske as oer dieren.
Lawrence, jim ûnthjit wie eigen baas
foar Arabieren, foar de helte
waard it Midden-Easten harren ryk,
want inkeld jim belangen telden.
Lawrence fan Arabië, sa waard
yn letter tiid dyn achternamme,
mar it ûnrjocht hearske yn dyn wrâld,
it Britske ryk hat him nea skamme.
* Foto ‘Thomas Edward Lawrence’
** Foto ‘Arabyske krigers’
