maart 8, 2020
fan ûnbekend*
Noch gjin hûn stjoert men de oarloch yn,
lit stean de jongste fan soldaten
dy’t fjochtsje moatte foar de macht
yn wat men neamt it heitelân,
dy wrede heit hat maklik praten.
Jong of net, djip gie ’t de boaiem yn,
de groppe om harsels te sparjen
foar kûgels, fleanend dei en nacht,
fier fan de macht yn ’t heitelân…
wêr soe de jongste ea bedarje?
Ut ’e groppe wei, de flakte op,
dêr’t kûgels om de earen fleagen,
gjinien sloech op de oare acht,
de jongste trof it, út ’e brân,
mar seach gjin hân mear foar de eagen.
Mei in hûn gie hy it libben yn,
dy’t him braaf oer de boaiem fierde:
twa-ienheid kriich it yn de macht
mei ien pear eagen oan de hân,
dy’t sparre wie foar oare tiden.
* Foto ‘Soldaat mei bline hûn’
maart 1, 2020
fan ûnbekend*
Wat is yn ’t universum absolút?
Ik soe it net betinke kinne,
want it minskdom stiet net stil
as bliuwend byld, mar tinkt foarút,
is altyd yn relaasje.
In stien is gaadlik foar in byld, ferslyt
lykwols, kin ’t fan de tiid net winne,
mar ien stien wie sterk fan wil,
alhiel gjin tinken yn swart-wyt,
mar alles yn relaasje.
Sa rint de romte lykop mei de tiid,
ferbûcht in swiere stjer de romte;
’t universum stiet net stil,
beweging is der wiid en siid,
’t hielal is yn relaasje…
… mei Albert Einstein en syn wittenskip
fan relativiteit en faasje.
* Foto ‘Albert Einstein’
