maart 22, 2020
fan ûnbekend*
De fraach wie net oft sy goed prate koe,
mar kin in frou wol kieze
as it giet om ’t lânsbelang?
Amearika mocht net ferlieze.
Jeannette Ranking kaam yn it Kongres
as earste frou dy’t prate
mocht mei noaten op har sang…
om ’t fredeskoeren waard sy hate.
As pasifiste wie sy tsjin de kriich:
Amearika moast wizer
wêze, net dat sy deadsbang
wie: oarloch makke ’t libben grizer.
Jeannette Ranking hie de slach ferlern:
Amearika woe stride,
’t gie foaral om ’t lânsbelang
en fierder om de heale ierde.
De fraach wie net oft sy net stride koe,
sy focht foar ’t bernelibben,
dat it rûn fan koart nei lang,
foar mem en bern hat sy lang stribbe.
Jeannette Ranking focht foar Luther King
as haad fan in brigade
fan fiiftûzen yn in mars
foar him, ien fan har fredespaden.
* Foto ‘Jeannette Ranking’
maart 16, 2020
fan ûnbekend*
Margaret wie ien fan alve,
de sechde, moai der tuskenyn,
sy wist fan heger en fan leger,
efkes foar, mar faker yn de wyn…
lit gean of stryk dêrtsjin de salve?
Feministe, dus ek roppen
om yn te striken tsjin it hier
fan wa’t it by it âlde hâlde
woene: alle nachten yn it spier,
de frou derûnder, man derboppe.
Margaret woe ’t tal beheine,
it kaam foaral op plannen del,
foaral net heger, leaver leger,
foar de measten klonk har lûd te skel,
in keppel bern wie dochs Gods seine?
Tsjin konsepsje hat se stribbe,
sa kaam der foar de frou in pil
om ’t oantal bern beheind te hâlden;
nei ’t skelle lûd waard ’t efkes stil:
de sel bedrige ’t warber libben.
Foto ‘Margaret Sanger mei har beide soannen’
