Lyrysk Deiboek – Pagina 785

admin

september 24, 2016

Yn ’t nije jier

Sy draacht it alle dagen troch
fan de iene oere yn de oare,
de nacht yn en wer yn it ljocht,
nei oan ’t hert en grutsk om’t foar har
in lytser famke fol bewûndering
de skat as heechste ideaal besjocht,
it laam dat sy as dûbel wûnder ken:
in libben dat harsels ta libben brocht.

Sy draacht it alle tiden troch,
fan de maitiid oant de winter,
de drompel oer fan ’t âlde jier
yn it nije as kokon mei flinter,
it ideaal dêr’t sy net sûnder kin,
bewuolle noch yn ’t tichte trieddehier,
mar ienris sil se ’t wiere wûnder sjen,
it leave lok dat komt yn ’t nije jier.

admin

september 24, 2016

Tredde krystdei

Lyrysk Deiboek

Do silst it krekt belibje
dat op ‘e twadde krystdeijûn
it noch begûn te snijen,
safolle dat de goare grûn
fan fjirtich krystfeestoeren
noch syn bestimming fûn.

By ’t opgean fan de sinne,
in blauwe bui noch oan de kym,
lei ’t ierdryk der wyt hinne
en wachte op wat ieuwen lyn
begûn op hoare finne
fan Betlehem, in liet op rym.